Do 30 ao 31 de maio marchamos á coñecer o Parque Natural de Montesinho, no noreste de Portugal. Este entorno natural montañoso, situado na fronteira con Zamora e Ourense, a altura de Viana do Bolo e Sanabria, é unha zona de grande beleza e diversidade natural. Fórmano os macizos de Montesinho e a Coroa (Sierra de la Culebra) que combinan altos de ata 1481 metros con profundos vales. Os seus ríos enchen de auga o Douro e crean fermosas paisaxes casa de lobos, cervos, gatos bravos, ratas de auga, carballos, corticeiras e varias plantas endémicas.
Situado nos concellos de Bragança e Vinhais ocupa as maior parte da antiga provincia de Tras-os-Montes. Faremos campamento na súa capital, Bragança, antiga cidade romana e solar dunha das máis nobres familias da historia de Portugal, para andar os seus camiños.
O sábado 30 de maio ás 8:00 h. da mañá marchamos da Coruña coa intención de chegar a aldea de Montesinho, moi perto da fronteira zamorana, para xantar.
A primeira hora da tarde sairemos dela a percorrer as nosa primeira ruta da viaxe: o PR3 "Porto Furado". Un percurso circular de 9 km. no que ascendemos ata o encoro de Serra Serrada atravesando fraga e paisaxe de alta montaña con mato baixo e boas perspectivas sobre as serra.
A volta visitaremos esta fermosa aldea tradicional portuguesa que lle dá nome ao parque e con sorte, haberá quen probe o seu queixo e a súa mel.
A media tarde tomaremos camiño a Bragança onde nos instalaremos nos nosos aloxamentos e nos reunirémos a cear. Quen teña forzas, trala cea, poderá unirse a unha visita pola cidade. Percorreremos o seu casco antigo pasando polas ruelas da Cidadela, o castelo medieval e pola Domus Municipalis, o único edificio románico civil da península.
No día seguinte tralo almorzo iremos en dirección ao Vinhais, unha vila no oeste do parque coñecida polos seus ancestrais Entroidos, os "Diabos", e polos seus "fumeiros", uns saborosos embutidos. Alí faremos unha camiñada circular de 15 kilómetros entre as aldeas de Río de Fornos e Travanca. Percorreremos todo un val por camiños ben abertos que serpentean entre prados e bosques de castiñeiros. A media tarde, tras recuperar forzas cun bo café portugués, iniciaremos o camiño de volta á Coruña.
A viaxe inclúe o desprazamento, o aloxamento, a cea do primeiro día e máis o almorzo e os bocadillos do xantar do segundo día, o seguro e o guiado.
O custe é de 130€ + aloxamento.
Imos contar con dous tipos de aloxamento para adaptarnos, na medida do posible, ás preferencias das participantes e ás prazas dispoñíbeis: a Pousada da Xuventude de Bragança e o Hotel Nordeste Shalom (**).
As opcións de aloxamento son as seguintes:
1. Cuarto de 4 camas na pousada: 22€ - Custe total: 152€
2. Cuarto dobre na pousada: 25€ - Custe total: 155€
3. Cuarto dobre no hotel: 32€ - Custe total: 163€
4. Cuarto individual no hotel: 47 € - Custe total: 177€
Se queres vir tes ata o 15 de maio para inscribirte. Podes facelo cubrindo este formulario:
https://forms.gle/mpWEEoMr25Kvoi4T7
Para máis información podes chamar ou escribir por whatsapp e telegram ao 653 013 224 (Inés).
Nenhum comentário:
Postar um comentário