Como cambia a paisaxe cando recuperamos un humidal? Como se sinte un chan seco fronte a un mollado?
Na primeira ruta da tempada transitaremos este proceso. Marchamos á Terra Cha para percorrer a ruta das Lagoas de Cospeito. Un camiño chairo e suave de 14 kilómetros atravesando un mosaico prados, montes e terras de labradío para despertar o corpo e polo a punto.
Comezaremos na igrexa de San Martiño de Lamas, ao sur do concello e achegarémonos entre camiños forestais e campos de millo ata a antiga Lagoa da Caballosa, hoxe desecada. A paisaxe muda a medida que continuamos cara Feira do Monte atravesando algunha pequena aldea a través de camiños algo máis serpenteantes. O cambio definitivo prodúcese ao cruzar a estrada provincial 111. Aquí cubrirannos carballos, castiñeiros e ameneiros e de caserío en caserio adentraremonos en Feira do Monte.
Alí faremos parada para repor forzas nunha carballeira á beira do camiño. De seguido a andaina chegará ao Museo das Aves que serve de porta de entrada á Lagoa de Cospeito. Os últimos tres kilómetros serán os máis fermosos, rodeando a lagoa á sombra das bidueiras e dos salgueiros con opción á subir as torres de observación das aves que empregan o humidal como zona de cria ou de descanso nas súas rutas migratorias. Esta é a ocasión perfecta para desempolvar os vosos prismáticos e extasiarvos uns minutos mirando para elas.
A lagoa é alimentada polo río Guisande (da cunca do Miño) que aquí atopa un terreo chairo e barrento, pouco permeable, no que se acumula a auga. Recuperouse nos anos 2000 tras un proceso de desecado que nos anos 70 a convertera en solo agricola, parecido ao que observaremos na lagoa da Carballosa. Dende entón a natureza estase rexenerando e a diversidade de aves, anfibios e plantas vai en aumento.
Os paxaros acompañaranos xa dende o inicio con niños de cegoñas, miñatos, bandas de corvos e pegas. Se fai bo día, temén o fará o sol que boura forte por esta zona. Non vos esquezades de levar unha boa gorra, protector solar e litro e medio de auga para repor líquidos na marcha.
Se vos animades a acompañarvos, podedes cubrir este formulario de inscripción:
https://forms.gle/sCB8Qz2eb4uoKgq29
Contacto: aminhapulga@gmail.com
Whatsapp: 653 013 224
